Eddiegul nanawagan nga itaral ang nagpatay kang Bas

CEBU, Philippines — Gikondenar ni Talisay City Mayor Eduardo Gullas ang kamatayon sa batan-ong konsehal sa Barangay Lagtang dungan ang pagmando sa kapolisan nga dakpon gyud ang responsable sa linuog nga krimen.

Si Art Stephen Bas, 23, gipusil patay sa mga lalaking nagmotorsiklo samtang nagmaneho sa sakyanan paingon sa iyang tunghaan sa Siyudad sa Sugbo sa niaging adlaw.

Sugdan sa awtoridad ang imbestigasyon labot sa background sa biktima ingon man sa amahan niini nga si kanhi kapitan Ferdinand “Dindin” Bas nga naapil sa narco-list ni Presidente Rodrigo Duterte.

Si Atty. Rocky Bas, uyoan sa namatay, nihangyo sa kapolisan nga ilang madakpan ang mga responsable sa krimen ug mataral sa hukmanan.

Si Supt. Marlu Conag, hepe sa kapolisan sa Dakbayan sa Talisay, niingon nga ilang paningkamutan nga mailhan ug madakpan ang mga tawo nga nipatay ni Stephen.

Iyang giawhag ang mga nakakita sa hitabo nga mopatim-aw ug makig-alayon kanila aron paspas ang imbistigasyon. Nagbangutan karon ang pamilyang Bas ilabi na nga ang batan-ong biktima walay laing tinguha nga mao ang pagkab-ot sa pangandoy niini para sa iyang kaugalingon, pamilya ug sa barangay hinungdan wala sila kasabot unsay rason sa mga mamumuno sa pagkutlo sa iyang kinabuhi.

Ang pamilya nanawagan sa lokal ug nasudnong pangagamhanan nga tabangan sila nga makabaton og hustisya sa kamatayon ni Stephen.

Sila nanghinaut nga ang nahitabo dili malakip sa ubang krimen nga hangtud karon wala nasulbad.

Ang pamilya nanawagan sab sa publiko nga dili mokondenar sa panghitabo tungod kay si Stephen usa ka maayong tawo, maayong pagka-anak, igsuon, pag-umangkon ug barkada nga mogradwar na unta karong Oktubre.

Nanawagan sab sila sa   pagtahud sa ilang privacy samtang sila nagbangutan kuyog sa ilang pamilya ug mga suod nga higala. (Rowena D. Capistrano/GMR)(BANATNEWS)