Pabrika gipasirad-an, baho nangalisbo
CEBU, Philippines – Gidid-an karon nga makaproseso og agricultural ug commercial food products ang usa ka pabrika human ang kagamhanan sa Siyudad sa Sugbo nipasira niini.
Kini mao ang Good Harvest Flavors and Spice Corp. nga nahimutang sa Sitio Canumay, Pit-os, Talamban, Dakbayan sa Sugbo.
Kagahapon, ang Prevention, Restoration, Order, Beautification and Enhancement (PROBE) Team nga gipangulohan ni Raquel Arce nipaskil sa closure notice gawas sa pabrika.
Usa ka nagpakabanang molupyo ang nipadangat og reklamo labot sa kabaho sa palibot.
Nasuta sa City Legal Office nga ang maong establisemento nakalapas sa revised zoning ordinance gumikan kay ang lokasyon niini anaa sa residential area.
Ang unang notisya giisyu niadtong Pebrero 27, 2018 ug Hulyo 13, 2018 ang PROBE niisyu og three-day notice sa pabrika pinaagi ni Eric Conlu nga nagpahibawo kanila nga ang siyudad mopasira sa ilang negosyo gumikan sa kalapasan sa balaud.
Apan sa wala pa ang notisya, si Mayor Tomas Osmeña nibasura sa hangyo nga dili una ipasira sanglit ang ilang bag-ong lugar giugmad pa.
“While the company is awaiting the completion of the new warehouse, we plead to be allowed to continue our operations at the present site up to December this year, with an undertaking that we would avoid any emission of foul odor,” tipik sa suwat sa kompaniya.
Nalatid sa suwat nga kun ang bag-ong warehouse mahuman na mobalhin dayon sila ug ihunong ang tanang operasyon.
Sigun ni Arce nga ang maong pabrika nakatuman sa omnibus tax ordinance ug ang kalapasan lang nila mao ang pagkahimutang sa residential area.
“Compliant sa tax, zoning ra. Foul odor ba mura ni siya magsagol or mag-manufacture, ang baho mogawas, moalisbo gud maong gi-complain sa residents,” sigun ni Arce.
Si Atty. James Go, abogado sa Good Harvest Flavors and Spice Corp., niasoy nga nisunod sila sa mando sa siyudad ug naa na sila sa proseso pagbalhin sa laing lugar. (/GMR)(BANAT NEWS)
- Latest
