Asawa ni VM Bucao napili sa ABC sa Talisay
CEBU, Philippines — Walay nakig-atbang sa asawa ni Bise Mayor Alan Bucao nga si Kapitan Marietta “Yehyen” Bucao sa Barangay San Isidro sa piniliay sa pagka-presidente sa Association of Barangay Councils sa Dakbayan sa Talisay kagahapon.
Bisan ang duha ka kapitan nga sila si Cuenco Manreal sa Pooc ug Edward Alesna sa Poblacion nga unang nipakita og interes sa maong posisyon nibotar man ni Bucao.
Si Celerino Magto Jr., city director sa Department of Interior and Local Government sa Talisay, nibutyag nga hapsay ang piniliay kay nagkahiusa ang mga kapitan.
Matud ni Kapitan Bucao nga nagkasabot na silang daan sa ubang kapitan inubanan ni Mayor Eduardo Gullas ug ni Kongresista Gerald Anthony “Samsam” Gullas nga siya maoy hatagan og higayon nga mangulo sa tanang kapitan.
Nagpasalamat siya sa mga kapitan sa pagsalig ingon man sa grupong Alayon nga gipangulohan ni Gullas.
Si Kapitan Bucao niingon nga ang suliran sa basura maoy una nilang tutukan nga maoy numero uno nga problema sa kabarangayan. (BANAT NEWS)
- Latest
