CEBU, Philippines — Luwas nga nakaabot sa Santa Rosa sa Olango Island ang 32 ka mga pasahero sa pumpboat nga pasaheroan human sila nalunod tungod sa kadagko sa mga bawod nga mihapak kanila sa dihang 500 metros na lang gikan sa pantalan.
Gitug-an ni Commander Jerome Cayabyab, sa Philippine Coast Guard, nga nahinabi sa Banat News nga gikan sa Hilton Wharf ang MB Santa Rosa Princess sakay ang 32 ka mga pasahero kagahapon sa hapon.
Apan sa dihang 500 metros na lang sila gikan sa dunggoanan sa Olango gihapak kini og dagkong balod ug nasudlan og tubig ang bangka hinungdan nga nalunod ang katunga niini. May tulo ka pumpboats nga daling miresponde ug nasalbar ang mga pasahero ingon man ang mga tripulante.
Dugang pa ni Cayabyab, iyaha pa karon gipasusi kung manifesto ug kung aduna ba kini clearance nga makalawig.
Samtang kagahapon sa alas tres kapin sa hapon nakadawat usab og tawag ang coast guard gikan sa Supercat nga nagpahibalong napawngan og makina ang ilang Fastcraft St. Jhudiel nga padulong sa Tagbilaran City.
Gipadad-an gilayon kini sa coast guard 4404 Rescue vessel ug nakig- coordinate usab ang shipping ug tugboat nga maoy moguyod sa barko nga diha pa lang sa kadagatan sa Shell Island sa Mactan Channel.
Gitug-an ni Cayabyab, ilaha pa sutaon kung unsay nahitabo ug pila usab ang sakay niini nga mga pasahero base sa manifesto niini, nakabalik ra hinuon sa pantalan ang mga pasahero niini.
Kagahapong adlawa nasinati sa Sugbo ang makusog nga hangin nga matud pa sa PAGASA resulta sa hanging habagat nga nabira usab sa bagyong Henry didto sa Calayan Island sa Luzon. (BANAT NEWS)