CEBU, Philippines — Giumol na sa Syudad sa Talisay ang environment task force nga maoy motutok sa pagpabaya sa katawhan sa kalikupan nga pangulohan ni kanhi konsehal Bernard Odilao.
Si Odilao mao kaniadto ang chairman sa committee on environment sa konseho sa dakbayan samtang siya konsehal pa kaniadto.
Matud pa ni Odilao nga dakong tahas ang gisangon kaniya ni Mayor Eduardo Gullas apan iya kining gidawat sa panghinaut nga makatabang sa dakbayan.
Siya nagkanayon nga dako kaayo og trabahuon ang iyang opisina apan pinaagi sa suporta sa siyudad mahimo ra gihapon nila kini.
Si Odilao nagkanayon nga una niyang pagabuhaton mao gyud ang pag-edukar sa katawhan labot sa pag-atiman sa kalikupan sama sa hustong paghipos sa basura ug pagprotihir sa kadagatan nga diin daghang nanginabuhi. (BANAT NEWS)