Politika unang gitan-aw sa kamatayon ni Mabano
CEBU, Philippines — Politika ang numero unong gitan-aw sa kapolisan nga motibo sa pagpusil patay kang barangay kagawad ug kanhi PO3 Roel Rama Mabano niadtong Martes sa hapon gawas sa barangay hall sa Kalunasan, Dakbayan sa Sugbo.
Butyag pa ni Police Regional Office-7 Director Debold Sinas nga base sa imbestigasyon nga pagdagan pa lang ni Mabano aduna nay intense political rivalry sanglit ubos si Mabano sa partido ni kanhi mayor Michael Rama.
Lakip sa ilang gitutokan ang giingong pagkalambigit ni Mabano sa ilegal nga drugas.
Apan nakuratan ang taga Barangay Kalunasan sa taho sa giingong kalambigitan ni Mabano sa ilegal nga drugas.
Base sa pamahayag sa barangay nga ang konsehal nakadawat og awards atol sa pagserbisyo niini sa kapolisan
“We discount any possibilities that this is politically motivated,” matud sa opisyal nga pamahayag.
Ang mga kauban ni Mabano nagtuo nga adunay kapasidad ug haum kini sa gihuptan niining peace and order committee sa ilang barangay. Human sa kamatayon ni Mabano, mopahugot pa ang barangay sa ilang security protocol pinaagi sa pagpuno og mga CCTV cameras nga ibutang sa mga vital areas ug maghangyo usab sila og police visibility nga motuyok sa barangay.
Ang barangay nipasalig sa ilang mga konstituwente nga luwas gihapon ang ilang lugar ug normal na ang operasyon bisan nagbangutan sila kuyog sa pamilya ni Mabano.
Awhag sa mga opisyal sa barangay ngadto sa kapolisan nga palawman pa ang imbestigasyon aron makab-ot nila ang hustisya alang sa ilang kauban.
Si Mabano kanhi operatiba sa City Anti-Illegal Drugs Special Operations Task Group (CAIDSOTG) sa Cebu City Police Office apan gilabay kini sa Mindanao human nalambigit iyang pangalan sa drugas.
Gipusil patay si Mabano sa duha ka wala mailhing mamumuno gawas mismo sa barangay hall.( GMR) (BANAT NEWS)
- Latest