CEBU, Philippines — Gipatutokan sa Traffic Patrol Group ni Cebu City Police Office director, Senior Supt. Royina Garma, ang pagmando sa trapiko sa Barangay Mambaling ilabi na atol sa rush hour.
Gibutyag ni Garma nga niadtong Sabado pa siya nimando sa TPG nga moabag sa mga sakop sa Cebu City Transportation Office (CCTO) sa pagmando sa trapiko.
Matud ni Garma importante nga maglihok ang mga sakyanan ilabi na sa alas 6 hangtud alas 10 sa buntag ug alas 4 hangtud sa alas 9 nga dili mabara ang mga eskina.
Si Cebu City Mayor Tomas Osmeña niumol sa ideya nga patabangon ang mga polis sa pagbantay sa dagan sa trapiko sa maong lugar human ang mga traffic enforcers naglisud sa pagtubag sa problema nunot sa nagpadayon nga pag-ugmad sa P638 milyones nga underpass project sa Natalio Bacalso Avenue ug F. Llamas Street.
Sugod niadtong Sabado ang mga sumasakay ug motorista nakasinati og grabe nga trapik human ang kontraktor sa proyekto nagsugod sa phase four sa underpass.
Gani sa maong adlaw ang traffic congestion niabot og 17 ka oras ug daghan ang naapektuhan niini. Sa kasamtangan duna lay 12 ka traffic enforcers sa maong dapit nga maoy nagbantay sa dagan sa trapiko nga gitabangan sa mga barangay tanod.
Sigun ni Osmeña nga ang pagbantay sa dagan sa trapiko dili trabaho sa kagamhanan sa siyudad apan sa kapolisan.
Ang operations chief sa CCTO nga si Francisco “Isko” Ouano nihangop sa lakang nga gihimo ni Osmeña ug gani niadtong Domingo nakita nila ang presensiya sa kapolisan.
Gihulagway ni Ouano nga makatabang kini og badlong sa mga jeep de pasaheroan ilabi na kadtong magpataka og hunong diha sa karsada ug iyang giangkon nga daghan gyud nga mga jeepney drivers nga mga badlungon. (BANAT NEWS)