25 ka giingong drug pusher ug user sikop

CEBU, Philippines — Mga 25 ka tawo nga giingong mga pusher ug drug user ang nasikop sa gipahigayong operasyon sa kapolisan niadtong Sabado diha sa dakbayan sa Sugbo ug Danao.

Nikabat ngadto sa P67 mil ang balor sa ilegal nga drugas ang nasakmit sa kapolisan gikan sa gikatahong pusher atol sa buy-bust operation diha sa Sitio Minulida, V.Rama Avenue, Barangay Calamba, Dakbayan sa Sugbo.

Ug nibalor ngadto sa P146, 120 ang kantidad sa ilegal nga drugas ang nasakmit atol sa Oplan limpiyo Danao diha sa Dakbayan sa Danao sugod niadtong Sabado sa gabii hangtud kagahapon sa buntag. Sa Dakbayan sa Sugbo, nasikop si Maricel Pladgero, 26, residente sa Sitio Lower Kawayan, Barangay Sambag 2.

Base sa report sa Cebu City Police Office (CCPO) nga usa ka street level target si Pladgero kinsa nakuhaan og usa ka gamay ug usa ka medium nga paketeng  gituohang shabu nga motimbang ngadto sa 5.70 ka gramo.

Sa Dakbayan sa Danao, nadakpan ang 11 ka  giingong mga pusher og shabu ug walo ka giingong drug user diha sa Sitio Juan Luna, Poblacion; Sitio Rotonda, Looc; Lapu-Lapu Street, Suba, Maslog ug Highway Looc, Danao.

Ang mga giingong pusher mao sila si John Januario Godinez, 22, residente sa Taboc, Looc, Danao City; Jida Banzon, 32, lumolupyo sa Rotonda, Looc; Claudine Magdadaro, 19, taga Liloan, Cebu; John Michael Cuervo, 20, taga Maslog, Danao City; Jacqueline  Manulat, 27 , Taboc, Maslog, Danao City; Raymond Aguilar, 28, taga Maslog, Danao City; Rey Mata, 42, residente sa Lapu-Lapu Street, Barangay Suba, Danao City; Fe Ramoneda, 44, taga Lapu-Lapu Street, Suba; Ronnel  Burgos, 36, taga Cambubho, Danao City; Janice Capuno, 34, taga Danasan, Danao City ug usa ka 17-anyos nga bayongbayong.

Samtang ang mga  giingong drug user mao sila si Raymond Mendoza, 40; Atenio Paco, 35; Milton Jule  Cando, 29; Lloyd Jules Ordigozo, 28; Marlon Osabel, 30; Ian Bandoquillo, 33; Nestor Abanid, 26 ug Charlie Dalogdog, 23.

Nakuha gikan sa maong mga dinakpan ang 42 ka gagmay’ng pakete ug duha ka medium nga mga pakete sa gituohang shabu nga mobalor tanan ngadto sa P146,120.

Sa laing bahin, lima ka motorista kinsa giingong nagdala og shabu ang nasikop atol sa gipahigayong checkpoint sa kapolisan niadtong Sabado sa gabii diha sa Dakbayan sa Mandaue.

Ang nasikop mao si Marcelo Segovia, 40, taga Tudela, Isla sa Camotes; Dante Ronario, 23, taga Poblacion, Dakbayan sa Lapu-Lapu, Mark Camacho, 40, taga Calaper, Bohol; James Paul Suploc, 27 ug Junjun Florida, 23, parehong taga Poblacion, Dakbayan sa Lapu-Lapu. (BANAT NEWS)