CEBU, Philippines – Giawhag sa usa ka opisyal sa Globe Telecoms ang publiko ug mga lokal nga mga opisyal pagtabang pagsanta niining pagpangawat sa kable nga maoy hinungdan sa pagkaputol sa koneksyon sa internet ug telepono sa ilang mga lugar.
Si Patrick Steven Gloria, Director sa External Affairs –VisMin, Corporate and Legal Services sa pakighinabi sa Banat News miingon nga pinaagi sa pag-edukar ug kooperasyon sa publiko magamit og maayo ang modernong teknolohiya.
Si Gloria miingon nga aduna silay mga gipanghimong mga lakang aron mapakgang kining mga pagpangawat og kable sa telepono sama sa pagduol sa mga barangay kapitan kaniadto ug ang padayong pag-awhag sa publiko nga motabang sa pagbadlong niining mga manghilabot sa mga linya. Giangkon niya nga tungod sa ilang kaniadto Bantay Kable program namenusan gyud ang mga insidente sa pagpangawat sa kable ug aduna say mga nangadakpan ug nakasohan.
“Ang mabuhat namo is to inform the people to be vigilant kay di namo ni tanan mabantayan ang mga kable. It is physically impossible. Kon naa silay mabantayan i-report dayon sa mga otoridad,” pasabot pa ni Gloria.
Matud pa ni Gloria, kon maputol ang koneksyon sa telepono o sa internet duha ray hinungdan, posibleng tungod kay wala makabayad sa bill sud sa kapin na usa ka buwan gikan sa due date o ba kaha naguba ang cabinet sa mga kable sama pananglitan kon kini nabanggaan o ba kaha gikawat gyud ang kable.
Iyang giklaro nga dili basta moputol ang Globe sa koneksyon tungod lang kay wala pa nakabayad. Kasagaran sa hinungdan mao gyud kining pagpangawat sa kable o nabanggaan ang ilang cabinet.
Sa pikas bahin, mosanong ang Globe sa tinguha ni Cebu City Mayor Tomas Osmeña nga ipalubong sa yuta ang tanang mga utility lines kay hugaw kining tan-awon.
“Whatever the government wants, as long as aligned with our direction and what is good for the customers, we will abide,” matud pa ni Gloria.
Aduna nay mga bag-ong mga subdivisions karon nga anaa na sa ilawom sa yuta ang mga kable kay gawas nga limpyo, usa usab kini sa pamaagi pagpakgang sa pagpangawat niini.
Si Gloria miingon nga kon adunay mga problema, kon simple lang sama sa inquiry sa billings, pag-ilis og address ug uban pang simpleng problema mahimong motawag sa ilang hotline 211. Kon komplikado nga problema mahimong moreklamo ngadto sa Globe Stores o magpatabang sa mga kaila nga kawani sa Globe. (BANAT NEWS)