CEBU, Philippines — Giisa ang bandera sa Pilipinas ug nagpalupad og 120 ka mga puting pati ang kapolisan sa Police Regional Office 7 isip pagsaulog sa ika 120 ka tuig nga nasudnong kaugalingnan kagahapong adlawa.
Dako ang pagtuo sa direktor sa PRO-7 nga si Chief Supt. Debold Sinas nga ang pagtimaan sa independence day makapataas sa moral sa kapolisan.
Si PNP Chief Director General Oscar Albayalde mipadala og mensahe nga gibasa ni Sinas atubangan sa mga sakop nga nanambong.
"Seryoso tayo sa ating adhikain sa publiko. Marami pa ring mga polis na ipagtatanggol ang mga tao laban sa mga masasamang loob. Ang bawat kagitingan at adhikain napapalitan ng karangalan na di natutumbasan ng kahit ano," basa pa sa maong heneral sa ubang parte sa maong suwat.
Sa press conference human sa maong programa, subling mipasidaan si Sinas nga tinud-on gyud sa PNP ug dili sila maluoy sa mga polis nga nalambigit sa ilegal nga mga kalihokan.
"Wala ta anang 'maluoy-luoy'. Kung naa tay ingon ana nga balaod, pero selective, dili ta makapadayon sa atong pagbag-o," dugang sa maong direktor.
Sa laing bahin, walay konsehal gikan sa oposisyon sa konseho sa Dakbayan sa Sugbo apil na ang mga barangay kapitan sa 80 ka barangay ang nitambong sa 120th Independence Day sa Plaza Sugbo kagahapon.
Sa tunga-tungang bahin sa paghatag ni Osmeña sa iyang mensahe kini nangutana kon duna bay mga barangay kapitan nga nanambong ug giimbitahan usab niya ang mga konsehal sa oposisyon sa entablado apan walay bisan usa ang mitambong.
Apan gidayeg sa mayor ang mga opisyales sa Sangguniang Kabataan Federation Cebu City nga nanambong gyud sa programa nga gipangulohan sa ilang presidente nga si Jessica Resch sa Barangay San Nicolas Proper. Apan si Konsehal Joel Garganera sa oposisyon miingon nga gisaulog niya ang selebrasyon pag-jogging didto sa Barangay Busay aron makahanggab og preskong hangin layo sa gihulagway niyang “suffocating,” “toxic” ug “venomous words” sa mayor.
“Today is supposed to be a day of peace and tranquility but he can’t let a day passes by without being himself, berating his fellow public officials as if he tries to impress that he has the monopoly of love for our country. He should free himself from his anger, rage and exasperation. Why? Because it’s bad for his health and I do care about him, sincerely,” Garganera pa.
Sa Dakbayan sa Lapu-Lapu, palahi usab ang mensahe ni Mayor Paz Radaza kagahapon ngadto sa mga Oponganon. Gusto niyang pakigbatokan sa mga Oponganon ang polusyon ug basura diha sa siyudad.
Matud sa mayor, sa karaang panahon ang kombate ug sakripisyo sa mga bayani sama nilang Dr. Jose Rizal, Datu Lapu-Lapu ug tanang mga bayani sa nasud mao ang kagawasan gikan sa mga langyaw nga mananakop.
Sa bag-ong panahon, dili na sama kaniadto ang hulga kondili naa mismo sa tugkaran ug kini mao ang nagpasad nga basura ug polusyon nga nahimo karong hulga sa siyudad.
Dili pa lang dugay, ang Department of Environment and Natural Resources (DENR) ug Environmental Management Bureau mipagawas sa resulta sa water sampling nga nagpakitang ang pipila ka mga bahin sa kadagatan sa siyudad taas kaayo ang level sa kagaw ug dili na gani mahimong kaligoan.
Ang siyudad gibansagang “resort city” tungod sa kadaghan sa mga resorts niini nga gumikan kay nalibotan man sa dagat ang isla apan nabutang karon sa peligro tungod sa basura ug polusyon. (/IBM)(BANATNEWS)