Van i-ali sa atubangan aron makapangawat

CEBU, Philippines — Bag-ong modus sa pagpanglungkab gigamit sa mga kawatan sa usa ka tindahan sa Barangay Poblacion East, Moalboal niadtong niaging kaadlawon diin nakuha ang usa ka vault nga may sulod nga mokabat sa P80 mil.

Si Police Officer 2 Arnold Sergio sa Moalboal Police Station nitug-an nga nakadawat sila og report gikan sa supervisor sa usa ka tindahan sa maong lugar nga si Clifford Asentista, 27, mahitungod sa usa ka pagpanglungkab sa gibantayan niining agrivet nga tindahan.

Buntag niadtong Sabado nakit-an sa mga empleyado sa tindahan nga guba na ang roll-up nga pultahan niini.

Atol sa pag-imbestigar sa kapolisan, ilang nahinabi ang usa ka nipatim-aw nga testigo nga niadtong alas dos sa kaadlawon sa adlaw’ng Sabado, aduna’y nakit-an nga van nga nag-parking atubangan sa maong tindahan.

“Nagtuo ang witness nga delivery to maong wala lang niya panumbalinga. Mao nani ilang bag-ong modus karon alihan nila ang atubangan sa establishment nga ilang kawatan sa sakyanan aron dili sila dali mabantayan,” matud ni Sergio.

Nidugang ang kapolisan nga usa ka organized crime ang maong pagpangawat.

Nakuha sulod sa tindahan ang pliers ug improvised cutter nga gituohang usa sa gigamit sa mga kawatan sa pagpugos og abli sa pultahan sa tindahan.

Si Sergio nidugang nga sa pagkakaron padayon pa silang naghimo og follow-up investigation lakip na ang pagtan-aw sa posibilidad nga inside job ang maong panghitabo. (BANAT NEWS)