Bag-ong kurso ipatuman, enrolment sa TVET nagpadayon

CEBU, Philippines – Mipahibawo ang Philippine Association of Real Estate Board (PAREB) sa bag-ong kurso nga Bachelor of Science in Real Estate Management (BS.REM)  alang sa mga nangandoy nga mamahimong lisensiyadong real estate broker. Matud ni Lucylyn Whysall, pangulo sa Cebu Real Estate Board (CEREB) nga ang BS.REM namugna ubos sa ilang Anti-Colorum Campaign aron sa paglikay sa mga ilegal nga mamaligya og yuta.

Ang BS.REM upat ka tuig kini nga kurso diin duha pa lang ka mga unibersidad sa Sugbo ang nagtanyag niini.  Ang maong duha ka unibersidad gilangkuban sa University of Cebu ug University of San Carlos.

Ang mga professional nga nigradwar ug upat ka tuig nga kurso mamahimong mo-enroll niini apan dili na sila moabot ngadto sa upat ka tuig sa ilang pag-eskwela mokuha na lang sila og pipila ka units.

Sigun pa ni Samuel Ortega Lao, national chairman sa PAREB nga nakignegosasyon na sila sa Professional Regulation Commission (PRC) ug karon ilang tinguhaon nga makigsabot sa Technical Education and Skills Development Authority (TESDA) aron mapatuman na sa tibuok nasud ang maong programa.

Sa laing bahin, ang TESDA-7 nipadayag og mga programa ug sumbanan alang karong buwan sa Hulyo hangtud sa buwan sa Disyembre niining tuiga ubos sa Universal Access to Quality Tertiary Education Act of 2017 alang sa mga interesadong aplikante.

Matud ni Regional Training Center-7 senior TESDA specialist, Luisita Yee nga nagpadayon gihapon karon ang enrolment sa nagkalain-laing programa sa Technical-Vocational Education and Training (TVET) ug ang mga interesadong aplikante kinahanglang makapasar sa entrance exam ug interview.

Lakip sa mga rekisitos mao ang senior high school report card o transcript of record; police clearance; duha ka 1”x1”ug passport-size nga ID picture; medical certificate kon angay ba moagi sa training ug birth certificate gikan sa National Statistics Authority. (Cherry Ann Fornez, UV Journalism Interns/BDB)(BANAT NEWS)