PWD center tukuron sa Ronda, San Remigio
CEBU, Philippines — Magtukod ang Kapitolyo og Persons With Disability (PWD) Rehabilitation and Therapeutic Center sa Lungsod sa Ronda sa habagatan ug San Remigio sa amihanang bahin sa Probinsiya sa Sugbo.
Ang Provincial Board pinaagi sa gipasar nga resolusyon nga giduso ni Bokal Yolanda Daan, chairman sa committee on differently abled persons, nagtugot kang Gobernador Hilario Davide III sa pagpirma og memorandum of agreement tali nilang Ronda Mayor Mariano Blanco III ug San Remigio Mayor Mariano Martinez.
Ang Lalawigan sa Sugbo pinaagi sa Provincial Social Welfare and Development Office ang magtukod sa center aron mas sayon sa mga PWDs ang pagpangayo og tabang ug serbisyo.
Sila si Blanco ug Martinez nipadayag sa ilang kaandam nga motabang sa Probinsiya sa Sugbo sa maong proyekto nga kantidad og tag P3 milyones ang matag usa alang sa pagpatukod sa building ug mga kahimanan niini.
Ang munisipyo ang magpili sa lugar asa tukuron ang center ingon man lista sa mga serbisyo nga gikinahanglan.
Tugotan sab nga makagamit sa pasilidad ang mga PWDs sa kasikbit nga mga lungsod ug siyudad.
Ang munisipyo ang mosweldo sa mga tawo nga modumala sa pasilidad. - Niña Mae P. Salvacion/CNU Intern (BANAT NEWS)
- Latest
