CEBU, Philippines – Moumol og management team ang Probinsiya sa Sugbo alang sa pagdumala sa Osmeña Peak sa Lungsod sa Badian.
Kagahapon nagtigum ang tanang stakeholders lakip na ang Kapitolyo, lokal nga kagamhanan sa Lungsod sa Badian ug Dalaguete ug mga pribadong organisasayon ug indibidwal nga adunay “tenurial instrument” sa maong lugar.
“I-carve out namo ang Osmeña Peak, among na-realize nga there’s an even overlapping of issuance of tenurial instruments, naay claim ni ALU-TUCP, si Dicdican naa siyay MOA ug Nepomucenos,” matud ni Bise Gobernador Agnes Magpale, chairman sa Provincial Tourism Commission. Si Magpale nagkanayon nga uyon ang Associated Labor Union- Trade Union Congress of the Philippines (ALU-TUCP) sa nahimong kasabutan uban ang mga nangangkon nga adunay “tenurial instrument” nga gi-issue ang Department of Environment and Natural Resources (DENR).
“Ang usa ka hangyo sa probinsiya nga mosugot ang ALU nga mo-carve out og area within the tenurial instrument grant to ALU, within the radius of one kilometer from the center of Osmeña Peak,” matud ni Arturo Barrit, tigpamaba sa ALU-TUCP Central Visayas.
Ang bise gobernador nagkanayon nga samtang maghuwat sa executive order sa gobernador nisugyot ang mayor sa Dalaguete nga kinahanglang adunay maayong development plan alang sa Osmeña Peak.
Matud ni Magpale nga gusto nila nga madali ang paghuman sa management team aron mabutangan na og signages ug uban pang angay nga development sa maong tourist destination alang sa mga lokal ug langyaw nga mobisita niini. (/GMR)(BANAT NEWS)