CEBU, Philippines – Gipahibawo sa Social Security System (SSS) nga ang mga boluntaryo ug mga self-employed nga kababayen-an ang mahimo na nga makagamit sa SSS text facility sa pagpahibawo sa ilang pagmabdos ug pagpanganak.
Kini ang gipahibawo ni SSS President ug Chief Executive Emmanuel F. Dooc isip kabahin sa ilang pagpalapad sa serbisyo.
“With just one text away, expecting mothers can now inform SSS of their pregnancy. It is more convenient for them since they no longer need to go to SSS personally to comply with the notification requirement,” matud ni Dooc.
Matud ni Dooc nga dili na kinahanglan nga mopakita og pruweba sa ilang pagmabdos ang usa ka miyembro sa paggamit sa SSS text facility apan unya na kini ipakita kung magkareimburso na sa ilang gasto sa pagpanganak. Ang paagi sa pagsumiter sa maternity notification via text message mao ang pag-type lang sa SSS MATERNITYNOTIF <SSNumber> <PIN> <Expected Delivery Date MM/DD/YYYY> <Total Number of Pregnancies (apil ang kasamtangang gimabdos)> ug i-send sa 2600.
Matag text nagkantidad og P2.50 sa Globe/Touch Mobile ug Smart subscribers ug P2 sa Sun Cellular subscriber.
Ang matag miyembro makadawat sa kompirmasyon sa higayon nga ang maternity notification malampuson nga madawat sa SSS.
Gawas sa pag-text sa SSS, ang maternity notification mahimo sab online pinaagi sa My.SSS portal sa SSS website. Pangayoon nga impormasyon sa miyembro mao ang petsa sa pagpanganak, ikapila na nga pagpanganak, ug petsa sa katapusang pagpanganak o pagkakuha sa gisabak.
Matud ni Dooc nga ang Text-SSS ug online facilities maoy tubag sa nagkataas nga demanda sa mga miyembro alang sa mas sayon nga transaksiyon sa SSS alang sa ilang maternity claims.
Iyang gipasalig nga dugang pa unyang pamaagi ang ilang himoon aron mapasayon pa ang ubang benepisyo. (Rejena M. Sevilla, PIT Interns/GMR)(BANAT NEWS)