CEBU, Philippines – Nagpatabang ang Provincial Board kang Senador Risa Hontiveros alang sa pagpalambo sa Hagnaya Port sa Lungsod sa San Remigio.
Pinaagi sa resolusyon nga gipangamahanan ni Bokal Horacio Franco, ang PB naghangyo sa senador nga magahinan og P70 milyones ang maong proyekto.
Ang Hagnaya Port maoy agianan sa mga tawo ug mga produkto gikan ug paingon sa Isla sa Bantayan ingon man sa Cawayan sa Probinsiya sa Masbate.
Matud ni Franco nga gumikan sa sigeng gamit sa pantalan, duna nay mga bahin niini nga nangaguba na ug angayan palambuon ug ayuhon.
Si Alex Tan, tag-iya sa Island Shipping Corporation nga nag-operate sa biyahe sa Hagnaya ug Sta. Fe, Bantayan, nagkanayon angayang i-prayoridad ang back-up area sa pantalan.
“Walay working or back-up area ang Hagnaya Port, lisud kaayo sa loading ug unloading. Plus passenger terminal,” matud ni Tan.
Nakita usab ni Kongresista Benhur Salimbangon nga kinahanglan palapdan pa ang pantalan ingon man ang pag-ugmad sa dugang pantalan sa Kawit, Medellin ug sa Baigad, Bantayan.
Nagpasalamat si Salimbangon sa pagtabang sab ni Franco. (Rejena M. Sevilla ug Mary Mel V. Coma, PIT Interns/GMR)(BANAT NEWS)