CEBU, Philippines — Gibutyag ni Cebu Provincial Police Office Director Senior Supt. Edgar Alan Okubo nga usa si kanhi konsehal Emilio Go nga gipusil patay niadtong Miyerkules sa listahan sa mga drug personalities and illegal gambling sa rehiyon.
“We also reviewed that the said person (Go) is on the list ng drug personalities sa region so, I told the police to check the rivalries kasi nasa listahan siya eh,” sigun pa sa maong direktor.
Gawas sa anggulo sa drugas, patutokan ni Okubo ang kalambigitan sa ilegal nga sugal ni Go ug politika sanglit kanhi man kini konsehal sa Dakbayan sa Talisay sukad sa tuig 2001 hangtod sa 2007.
Si Go gipusil diha sa ilang balay sa wala mailhing mamumuno nga nagsakay og duha ka mga sakyanang kolor blue ug puwa niadtong Miyerkules sa gabii.
Ang direktor nagtuo nga usa ka dakong grupo ang nakaaway sa biktima.
Sa pikas bahin, nagdumili ang pamilya ni Go paghatag og kopya sa CCTV footage ngadto sa kapulisan nga gituohan nilang makatabang pagsulbad sa kaso. Igo rang gipatan-aw ang mga polis sa footage apan hanap.
Si Insp. Inar Vic Florece, deputy sa Talisay City Police Station miingon nga mangita sila og laing footage nga maklaro ang duha ka sakyanan ug gunman.
Ang mga sakop sa media misuway pagkuha og pamahayag gikan sa pamilya ni Go bahin sa pasangil sa kapolisan apan wala sila mohatag og pagtugot nga ma-interbyu. (IBM) (BANAT NEWS)