Enforcers ug polis gipasidunggan ni Radaza

CEBU, Philippines — Gipasidunggan ni  Lapu-Lapu City  Mayor Paz  Radaza ang walo ka traffic enforcer kinsa  nakadakop og kawani ug opisyal sa gobiyerno nga mga nakalapas sa lagda sa trapiko.

Nunot sa paghatag og pasidungog iyang gitunol ang P2,000 nga cash incentive alang niadtong traffic enforcer nga nakadakop og ordinaryong kawani sa gobiyerno ug P5,000 alang niadtong nakadakop og opisyal nga naglakip sa department head o barangay official.

Gawas sa maong mga traffic enforcer lakip nga gipasidunggan ang traffic police nga si PO3 Jonathan Hilayagan kinsa nadestino diha sa traffic division sa Lapu-Lapu City Police Office.

Si Hilayagan nakadawat og P5,000 nga cash incentive tungod sa iyang pagdakop sa usa ka barangay official ug laing P2,000 ang iyang nadawat tungod sa iyang pagdakop sa kawani sa City Hall kinsa nakalapas sa lagda sa trapiko.

Ang mga enforcer nga nakadawat og P2,000 nga incentive gilangkuban nila ni Noel Orcales,  Era Navarro, Ricardo Dionaldo, Airo Ceniza, Manuel Yu  Jr. ug Roldan Andales  nga pulos sakop sa CTMS diin ilang gidawat ang   P2,000 nga cash incentives.

Samtang duha usab  ka traffic enforcer ang nakadawat usab og P5,000 nga cash incentive  human sa ilang pagdakop og mga barangay konsehal sa usa ka barangay sa dakbayan nga nakahimo og kalapasan sa lagda sa trapiko nga gipatuman sa kagamhanan. (BDB) (BANAT NEWS)