CEBU, Philippines — Pagpalubong sa hingpit sa mga bata nga napaig sa sunog sa tulo ka sitio sa Pajo, Dakbayan sa Lapu-Lapu maoy tinguha sa kabanay nila ni Yoko Han ug Kent Cyril Cañedo.
Matud ni Maribel Cañedo, iyaan sa mga bata, nga nangayo sila og tabang aron malubong na sa hingpit ang mga bata ilabi na biktima sila sa sunog ug wala pay financial assistance nga magamit sa pagpalubong niini.
Sa pagkakaron ang bukog nga nahabilin sa mga bata anaa pa sa plato samtang gipahigayon ang pangadye niini ug karong Huwebes gitinguha nga malubong kini.
Si Pajo Barangay Kapitan Junard “Ahong” Chan nagkanayon nga mahimo ra malubong ang mga bata tungod kay adunay libre nga lungon basta 3-anyos paubos ug anaa usab ang Department of Social Welfare and Development nga motabang.
Samtang gitugot na sa mga biktima sa sunog ang pagpabalik sa lugar human ang kagamhanan pinaagi ni Mayor Paz Radaza, Chan ug pipila ka pribadong pundok ang nagkahiusa sa paghatag og hinabang.
Si Chan niingon nga ilang gideklarar nga state of calamity ang tulo ka sitio nga mao ang Kitchene, Camansi ug New Paradise aron magamit ang ilang calamity fund.
Mokabat sa P1.10 milyones ang kantidad nga gigahin alang sa pagtabang sa mga biktima kinsa kasamtangang gihatagan og libre nga makaon nga molungtad og tulo ka adlaw.
Si Chan nitug-an nga ilang ipahigayon ang re-blocking sa nasunogan pagseguro nga dili na masubli ang nasinati sa kabomberohan.
Nasuta nga 855 ka pamilya o 2,000 ka tawo ang nawad-an sa ilang panimalay atol sa maong sunog. (BANAT NEWS)