P5M gibubo sa 3rd district
CEBU, Philippines — Dili mominus P5 milyones ang kantidad sa giapod-apod nga ekipo ug materyales sa Probinsiya sa Sugbo ngadto sa mga konstituwente sa tirsero distrito atol sa Caravan of Services sa Lungsod sa Balamban.
Dili sab mominus upat ka farmer’s organizations ang nakadawat sa nagkadaiyang farm machineries ug ekipo gikan sa Lungsod sa Asturias, Balamban, Tuburan ug Pinamungajan ug Dakbayan sa Toledo.
Si Gobernador Hilario Davide III uban si Bise Gob. Agnes Magpale ang nangulo sa distribusyon kagahapon sa Cebu Provincial Hospital – Balamban kuyog ang mga department heads sa Kapitolyo.
Matud ni Roldan Saragena, provincial agriculturist, nga gawas sa paghatag og mga ekipo ug financial assistance, ang Kapitolyo naghatag sab og libre nga deworming, antibiotics, vitamins ug consultation sa kahayopan.
Ang serbisyo karaban sa Balamban mao ang ika-lima nga gihimo sa Kapitolyo sulod sa ikaduhang termino ni Davide isip gobernador diin ang una didto sa Isla sa Bantayan, Isla sa Camotes, Badian ug Oslob sa niaging tuig.
Usa ka centenarian nga si Marcelo Eliodora sa Dakbayan sa Toledo ang nakadawat sab og P50 mil nga cash award gikan sa Kapitolyo. Siya nag-edad og 100-anyos karong tuiga.
Ang gobernador ug bise gobernador nibisita sab sa Biasong Elementary School diin adunay gihatag nga usa ka unit nga school building nga adunay duha ka classrooms diin gigastuhan sa Kapitolyo og P2 milyones. (BANAT NEWS)
- Latest
