CEBU, Philippines — Nagdeklarar ang Department of Health (DOH) og outbreak sa sakit nga measles kon tipdas sa pito ka lugar sa probinsya sa Negros Oriental.
Kini human namatikdan sa DOH Regional Epidemiology and Surveillance Unit (RESU) ang kalit nga pagsaka sa mga kaso sa tipdas sa maong mga lugar sa mga niaging semana.
Duna nay 21 ka kaso nga na-record sa mga lungsod sa Bacong, Mabinay, Santa Catalina, San Jose, Siaton, Valencia, ug sa dakbayan sa Dumaguete sumala sa suwat ni DOH Regional Director Dr. Jaime Bernadas kang Gov. Roel Degamo.
Ang siyudad sa Dumaguete maoy dunay kinadaghanang na-record nga kaso sa tipdas. Siyam ka kaso ang natala dinhi. Duha niini ang kompirmado na, samtang ang pito, padayon gihapon nga giobserbahan sa DOH.
Sa pagkakaron, walay nangamatay matud pa ni Dr. Liland Estacion sa Integrated Provincial Health Office (IPHO).
Apan si DOH Negros Oriental Head Dr. Socrates Villamor mitataw nga walay angay kabalak-an ang mga Negrense. Nagsugod na sila og house to house immunization batok sa tipdas sa mga lugar nga naigo sa maong outbreak.
Ang tipdas makatakod nga sakit nga posibleng ikamatay kon dili matambalan. Kasagarang maigo ini, mga bata. Apil sa mga sintomas sa tipdas ang hilanat ug pagpula sa panit. (BANAT NEWS)