Problema sa siyudad nasulbad ra
CEBU, Philippines — Gisaulog sa Cebu City Government ang ilang 81st Charter Day Anniversary nga gipahigayon sa Plaza Sugbo diin taliwa sa pagbunok sa uwan kagahapon wala kini makabalda sa kalihukan.
Ang kalihukan gisugdan og Santos nga Misa nga gipangulohan ni Rev. Fr. Raul Cabugao, OSA, ug gitambungan sa mga opisyales sa siyudad, mga kongresista sa north ug south district ug mga empleyado sa City Hall.
Sa iyahang Charter Day message, si Mayor Tomas Osmeña miingon nga ang tema niya karon “Today was yesterday’s tomorrow.”
Pipila sa gihisgutan sa mayor mao ang problemang pinansiyal sa siyudad apan nalakaran nila kini nga wala hilabti ang halin gikan sa mga dagkong kompaniya nga naa sa South Road Properties. Ang mayor miingon sab nga dunay problema sa basura apan dili na sama sa milabay nga administrasyon.
I-regulate usab sa siyudad ang Angkas may pagtugot o wala sa nasudnong kagamhanan.
Gipasalamatan sab niya ang mga tawo nga nagpaluyo sa kalampusan nga naangkon sa Sinulog ning tuiga.
Si Vice Mayor Edgardo Labella sa Barug Team Rama mihulagway nga maayo ang plano ni Osmeña apan kini mitataw nga mohimo lang gihapon sila sa ilahang trabaho.
Human sa speech gipasidunggan sa siyudad ang mga empleyado ug mga Sugbuanon nga naghatag og dungog sa siyudad. (BANAT NEWS)
- Latest
