Wa narehistro apil sa fluvial

CEBU, Philippines — Gihangop ug gikalipay ni Lapu-Lapu City Mayor Paz Radaza ang unang higayon nga nakabisita ang Mahal nga Birhen sa Guadalupe ug Señor Santo Niño isip kabahin sa iyang kapistahan kagahapong adlawa.

Matud ni Radaza nga uban sa iyang mga opisyal ug mga Oponganon dako kaayo nilang kalipay diin sa unang higayon nalakip sila sa Fiesta Señor.

Bagang duot sa katawhan ang nihugop tungod kay tanang Oponganon ang nigawas sa ilang balay aron mosugat ug moabi-abi sa pag-agi sa Mahal nga Birhen sa Guadalupe ug Santo Niño.

Pangindahay ni Radaza uban sa mga Oponganon ang maagi na gyud sa ilang dakbayan matag tuig ang manag-inahan aron malakip sila sa mga kalihukan sa Fiesta Señor.

Sa tiilan pa lang sa Mandaue-Mactan Bridge liboan ka tawo ang nag-atang sa Traslacion gikan sa Dakbayan sa Mandaue diin gikuyogan nila ni Bise Mayor Carlo Fortuna ug kaubanan nga mahinangpon nga gidawat ni Radaza ug ubang opisyal ug kaparian sa Virgen De la Regla ug gisunod ang pagdala niini ngadto sa simbahan diin gipahigayon ang Santos nga Misa una ang fluvial procession.

Samtang kapin sa 200 ka sakayan sa kadagatan ang niapil sa fluvial procession kagahapon sa buntag nga nanukad sa Naval Forces Central sa Dakbayan sa Lapu-Lapu hangtud sa Dakbayan sa Sugbo.

Apan matud ni Coast Guard Commander Jerome Cayabyab nga 70 lang niini ang nagparehistro sa ilang buhatan ug nisunod sa gihatag nila nga cut-off niadtong Enero 18.

Wala hinoon sila’y disgrasya nga natala ug malinawon ra nilang nahuman ang fluvial ug luwas ra sab ang BRP Agta nga giluwanan sa Balaan nga Bata nga si Señor Santo Niño ug Mahal nga Birhen sa Guadalupe sa Pier 1 diin didto kini nidunggo.

Dugang pa ni Cayabyab nga gikan sa Navforcen gidala nila karon tuiga ang BRP Agta sa may South Road Properties habig sa Mambaling aron sa paghatag og higayon sa mga nag-atang sa baybayon sa SRP nga makakita sa gisakyan sa Mahal nga Birhen ug Señor Santo Niño.

Nag-una nga hinungdan sa  wala pagparehistro sa uban mao nga wala nila naapas pa ang katapusang oras nga pagdawat alang sa pagparehistro ug ang pipila usab kanila ilang gituyo nga magparehistro sa paglikay sa bayranan.

Nipadayon sa ilang pagkuyog sa fluvial procession bisan wa na narehistro tungod kay nahimo na man nilang saaran ang pagsalmot sa tinuig nga kalihukan sa kapistahan ni Señor Sto. Niño.

Bisan pa man niini si Cayabyab niingon nga mas daghan karon ang nagparehistro nga mga tag-iya og mga sakyanan sa kadagatan itandi sa niaging tuig nga fluvial procession. (BANAT NEWS)