CEBU, Philippines — Gisabotan sa mga anak sa senior citizen kinsa naligsan patay sa sakyanan sa Provincial Disaster Risk Reduction and Management Office (PDRRMO) kong mopasaka ba sila og kaso batok sa drayber.
Si Rodrigo Sumobay, 67-anyos naligsan niadtong Martes sa buntag diha sa South Road Property habig sa Barangay San Roque, dakbayan sa Talisay.
Si Geraldine Cañoneo usa sa mga anak sa biktima mibutyag nga unom sila ka managsuon ug magsabot pa sila sa ilang mga plano ug lakang nga himoun.
Sa iyang bahin, si Cañoneo nagkanayon nga disgrasya ang hitabo ug wala pasagdi ang ilang amahan human kini mabanggai ug gitubag usab ang mga galastohan nila sa tambalanan.
Ang drayber nga si Nicolas Matugas, 48-anyos, casual employee sa Kapitolyo niingon nga wala gyud siya nagtuo nga adunay tawo nga molabay diha ibabaw sa taytayan.
Subay niini, ang hepe sa PDRRMO Baltazar Tribunalo nagkanayon nga papahuwayon lang una sulod sa pipila ka adlaw si Matugas kong makagawas kini gikan sa detention cell sa Talisay City Police Station. Gipasabot ni Tribunalo nga si Matugas posibleng nakasinati usab og trauma sa maong insidente.
Karong adlawa si Gobernador Hilario Davide, III mobisita sa haya ni Sumobay diha sa Talisay.
Ang Kapitolyo una na kining nanghatag og hinabang sa pamilya ug nisaad nga maoy mogasto sa tanan gikan sa haya hangtud nga mapahimutang ug malubong na si Sumobay. (BANAT NEWS)