Panagtagbo Festival sa Mandaue gibag-o

CEBU, Philippines — Mopasiugda ang Taga Mandaue, Inc. (TMI) uban sa kagamhanan sa Dakbayan sa Mandaue og bag-o nga Panagtagbo Festival 2018 isip kabahin sa pagpalawom sa pagtuo ngadto Ginoo ug sa Sagrada Familia ug ingon man pagpalig-on sa sektor sa turismo sa dakbayan.

Kini nagsugod niadtong Biyernes hangtud karong Biyernes, Enero 19, nga matigayon pinaagi sa  street dancing competition ug festival queen showdown.

Nunot sa maong kalihukan, maoy mosalmot sa pagpasundayag ang 340 ka exhibitors sa nagkadaiyang Sagrada Familia collections nga sugdan sa pagbukas sa Enero 12 hangtud sa Enero 22 nga pagahimoon sa ikaduhang andana sa Parkmall sa Dakbayan sa Mandaue.

Ang walo ka  clusters nga gilangkuban sa tanang barangay sa dakbayan ang magtigi sa Panagtagbo Street Dancing Competition sa Enero 19 sa alas 3 sa hapon hangtud sa alas 5 sa hapon pinaagi sa street dance parade sa Barangay Tipolo, Guizo ug dalan Burgos sa Barangay Centro.

Ang labing bag-o nga gidugang nga makapanindot sa Panagtagbo Festival Queen Showdown gikan sa walo ka clusters himoon sa Mandaue City Sports Complex sa alas 8 sa gabii sa Enero 19.

Ang Panagtagbo Festival karong tuiga mao usab ang magtala sa labing unang Panagtagbo Food, Beverage ug ingon man Lifestyle Night Festival nga magpasundayag usab sa mga pagkaon ug nagkadaiyang ilimnon nga produkto sa dakbayan. (BANAT NEWS)