Ecstasy nasakmit

CEBU, Philippines — Usa ka giingong nanag-iya og hotel ug ang gitumbok niining supplier sa ecstasy ang nadakpan sa kapolisan inabagan sa Philippine Drug Enforcement Agency-7 sa buy-bust operation sa R. Suite, dalan A.C Cortes, barangay Alang-alang, Dakbayan sa Mandaue.

Ang tag-iya og usa ka hotel sa Dakbayan sa Mandaue giila nga si Richard Ngo Go, 40, residente sa maong dapit, samtang  nadakpan sa follow up operation si Benjamin Yap, 33,  taga Gochan Subdivision, Quiot Pardo, Dakbayan sa Sugbo nga giingong iyang supplier sa ecstasy.

Sumala pa ni Police Regional Office-7 Regional Director Chief Supt. Jose Mario Espino unang nasikop si Go nga nakuhaan og usa ka plastic nga gisudlan og napulo ka mga tabletas nga “blue Telegram Ecstasy” usa ka gikatahong “Orange Amora Ecstasy” ug usa ka botelyang juice nga gidudahang sinagulan og ecstasy.

Pinaagi sa impormasyong gibutyag ni Go nitug-an kini nga si Yap ang supplier niini hinungdan nga kini gironda ug nakuhaan usab og napulo ka tabletas ug kapsula sa gidudahang ecstasy, usa ka plastic nga gisudlan og tulo ka mga kolor yellow nga tabletas nga gituohang  mga ecstasy, napulo ka mga orange nga kapsula sa gidudahang ecstasy, cellphone ug kwarta nga P1,500 nga gituohang halin sa ilegal nga negosyo.

Sigun pa ni Espino nakadawat sila report nga ibaligya ni Go ang mga ecstasy sa mga guests nga mag-party sa gipanag-iya niining hotel.  Si Go ug Yap nagdumili paghatag og pamahayag sa media atol sa pagpresentar kanila.

"We are still investigating kun sino pa yung mga connections nito na nagbebenta ng ecstasy," ang direktor miingon.

Ang Regional Director sa PDEA-7 nga si Atty. Emerson Margate mipadayag nga mas delikado ang ecstasy kon itandi sa regular nga ilegal nga drugas.

"Mas delikado siya because of its components. Sa Manila they call it ‘rape drug’ kasi hindi mo na alam kung ano na ang nangyayari sa paligid mo," si Margate miingon.

Base sa drugfreeworld.org, ang ecstasy usa ka happy drug diin bation og tumang kalipay ang moinom niini, apan delikado kay bisag unsa na lang ang gisagol paghimo niini sama sa cocaine, heroin, amphetamine, methamphetamine, purga sa iro, rat poison, caffeine ug uban  nga makaguba sa sistema sa lawas sa motumar niini.

Samtang 16 ka tawo usab ang nadakpan sa anti-illegal drugs operation nga gihimo sa kapolisan sa Lapu-Lapu, Mandaue ug Danao cities nga miresulta sa pagkasakmit usab og shabu nagkantidad tanan og kapin P50 mil. (BANAT NEWS)