CEBU, Philippines — Nahan-ay ug preparado na ang pagbisita sa balaang bata Senior Santo Niño diha sa Operation Second Chance, Cebu City Jail female dormitory ug Cebu City Jail male dormitory karong adlaw nga Martes, Enero 9, 2018.
Gikatakdang ala 1:00 sa hapon mobiya ang imahen sa balaang bata diha sa Basilica Minore del Santo Niño paingon ngadto sa Operation Second Chance sa Barangay Kalunasan diin moagi kini diha sa Osmeña Boulevard, Fuente, M. Velez, Guadalupe dayon ngadto na sa OSC.
Sa alas 2:30 sa hapon ipahigayon ang Santos nga Misa ug isunod dayon ang veneration sa imahen.
Sa alas 4:00 sa hapon dad-on na usab ang imahen diha sa female dorm diin adunay ipahigayon nga Santos nga Misa ug isunod usab ang halad alang kang Santo Niño sa mga inmate uban sa ilahang pamilya.
Sa alas 6:00 sa gabii dad-on na usab ang imahen ngadto sa male dorm diin adunay ipahigayon nga pagbisita sa imahen ngadto sa mga silda ug sundan kini sa vigil ug veneration hangtud sa buntag sa Enero 10.
Sa alas 12:00 sa udto adlaw nga Miyerkules ipahigayon ang Santos nga Misa diha sa male dorm ug sundan sa send-off rites aron sa pagbalik na sa imahen diha sa Basilica Minore del Sto. Niño.
Ang pagbisita sa prisohan usa sa mga preliminary activities sa ika-453rd fiesta senior nga buksan na sa Enero 11.
Matud ni Padre Ric Anthony Reyes, OSA, secretary sa fiesta senior nga ang pagbisita sa balaang bata diha sa prisohan ug tambalanan usa sa mga pamaagi aron sa pagpakita sa dakong gugma sa balaang bata ngadto sa tanang tawo bisan pa man og sila anaa sa prisohan ug padayon nagbayad sa ilang kasal-anan ug anaa sa tambalanan ug padayon nga nagpaalim sa ilang gihambin nga balatian.
Kahinumduman mibisita usab ang balaang bata diha sa mga publikong tambalanan sa dakbayan sa Sugbo. (BANAT NEWS)