14 Chinese gikiha

CEBU, Philippines — Gipangkasohan na ang 14 ka mga Chinese nationals tungod sa pag-operate og online lottery nga way permiso sa Philippine Amusement and Gaming Corporation (PAGCOR).

Si Prosecutor II Venice Balansag mikiha nilang James Long, Zhou Zhizhong, Lin Yangshan, Yao Nana, Yu Yingzeng, Hu Zhijian, Lin Yumin, Lin Xiao Di, Lin Gun, Lin Wei Yi, Yu Ying Jie, Yao Pei Hung, Xu Yunming, ug Chen Sudan human adunay nakitang probable cause tungod sa paglapas sa Section 3(b) sa Republic Act (RA) 9287 sa giamendahang Presidential Decree 1602 in relation to Section 6 sa RA 10175 o Cybercrime Prevention Act.

Atol sa inquest proceedings, ang mga akusado nagdumili pagpaubos sa preliminary investigation aron unta matubag ang mga pasangil batok kanila kay matud pa ilaha na lang kining atubangon ngadto sa korte.

Ang matag usa kanila papiyansahon og P24,000  alang sa temporary nilang kagawasan.

Ang mga suspek nadakpan sa mga sakop sa Regional Special Operations Group (RSOG)-7 pinanguluhan ni Police Superintendent Reynaldo Magdaluyo niadtong Disyembre 13, 2017 sa alas -5 sa hapon pinasikad sa search warrant batok ni  Chih-Hao Huang ug mga kaubanan diha sa House No. 15, King’s South Street, Doña Rita Village, Banilad Cebu City.

Ang grupo gipasanginlang nag-operate og online gambling nga didto sa China ang gawas sa resulta nga gitawag og “Bo Guan” ug “Yongli International.” Si Huang wala pa madakpi hangtud karon. (BANAT NEWS)