CEBU, Philippines — Sigurado nga “Merry” gyud ang Pasko sa mga tinun-an sa Asian College of Technology human nga gipahibawo ni Cebu City Mayor Tomas Osmeña nga giaprubahan sa korte ang Compromise Agreement tali sa Cebu City Government ug Asian College of Technology/Asian College of Technology International Education Foundation (ACTIEF).
Kahinumdoman nga dugay rang gitinguha ni Osmeña nga mahatagan og kasulbaran ang maong isyu diin si South District Representative Rodrigo “Bebot” Abellanosa nga Presidente sa ACT ug konsehal kaniadto sa siyudad dihang nisulod og kasabutan sa scholarship program ang tunghaan diin ang siyudad maoy mobayad sa tuition sa mga estudyante.
Nasayran nga adunay city scholars nga ni-gradwar sa ACT apan wala makakuha sa ilang Transcript of Record (TOR) gumikan sa wala pagbayad sa siyudad sa obligasyon niini sa naasoy’ng tunghaan tungod sa maong isyu.
Sa post ni Osmeña sa iyahang official Facebook page gipahibawo niini nga ang korte ni-aprubar sa compromise agreement tali sa siyudad ug sa ACT diin pasabot niini kun makabayad ang siyudad sa tunghaan ma-release na ang ilang TOR.
Ang huwaton na lang sa siyudad ang clearance gikan sa Commission on Audit (COA).
“I know many of you have been waiting for years. I promised you that I would fix the mess we were left with. I have not forgotten. We’re almost there. All that’s needed now is clearance from COA. In light of the court ruling, this will not be a problem,” tipik sa post sa mayor. Tinguha sa siyudad nga ma-release ang tanang TOR sayo sa tuig 2018.
Gipaabot nga ang bayran sa siyudad anaa na lang sa P56 million isip settlement amount gikan sa P186 million nga gipaningil sa tunghaan human gi-waive sa ACT ang interest niini. (BANAT NEWS)