CEBU, Philippines — Limpyohan ang Dakbayan sa Sugbo sa mga illegal sidewalk vendors ug mag-vandal sa kadalanan ubos sa programang “discipline zone” sa kapolisan.
Kini ang tutukan sa kapolisan sa lainlaing police stations ubos sa mando ni Police Regional Office-7 Director, Chief Supt. Jose Mario Espino aron mahapsay ang mga dalan ilabi na sa nagsingabot nga Pasko ug Sinulog.
Una nang gideklarar nga discipline zone ang Osmeña Boulevard ug Lahug gumikan sa kahuot sa trapik atol sa rush hour.
"We will no longer see yung graffiti. Walang parking sa gilid and loading at unloading sa haba ng Osmeña Blvd," si Espino niingon.
Usa ka technical working group ang umolon aron masabutan kun unsaon nila pagpatuman ang maong mando.
Gilambigit sab ang Barangay Apas ug Lahug sa maong tigum diin nisaad sab sila nga magbutang og discipline zone sa ilang barangay.
Si Apas Barangay Kapitan Ramil Ayuman niingon nga andam sila mohimo og ilang discipline zone aron daling maaksyunan ang mga problemang posibleng motumaw.
Sugdan ang maong programa karong Disyembre 1. (BANAT NEWS)