CEBU, Philippines — Masinati karon hangtud sa adlaw nga Huwebes ang menus nga pag-ulan human nakagawas na sa nasud ang Low Pressure Area nga anaa sa kadagatan sa Coron, Palawan, apan gipaabot pa ang daghan nga ulan nga masinati hangtod sa pagtak-op ning tuig 2017 sumala pa sa Pagasa.
Gipanglantawan ang kainit sa panahon sa adlaw nga Huwebes, apan tungod sa mga localized thunderstorm adunay mga lugar sa Kabisay-an ang makasinati gihapon og mga panagsang pag-ulan-ulan, nga nagdala og panugdog ug kilat.
Ang bag-ohay lang migawas nga LPA maoy nagbira sa kusog sa hanging habagat inubanan sa hinay ngadto sa kusog nga ulan sa niaging mga adlaw.
Matud pa ni Alfredo Quiblat sa PAGASA Mactan, adunay posibilidad nga mahimong bagyo ang LPA apan nakagawas na kini sa PAR.
Apan aduna na sab laing LPA ang gibantayan nga posibleng mosulod sa nasud karon Huwebes ug sa Kabisay-an kini posibleng unang moigo.
Samtang gibutyag ni Quiblat, 40 ngadto sa 60 porsiyento ang kahigayunan nga adunay mahitabong weak La Niña Phenomenon karon sa nasud.
Sa buwan sa Septiyembre aduna lamang unta 178.2millimeter nga average Rainfall Measurement, apan karon 300mm ang ilang natala nga nagpasabot mas daghang tubig ang gibubo sa uwan. (BANAT NEWS)