CEBU, Philippines - Gihulga nga pangbitayon ni Police Director General Ronald “Bato” Dela Rosa ang mga polis nga narelibo kon mapamatud-an niya ang taho nga mamayad kini aron dunay mopirma sa attendance sa Camp Crame.
Kini human nahibaw-an nga dunay pirma ni PO3 Ryan Martus Quiamco ang attendance sa Camp Crame niadtong adlaw nga nahitabo ang drug operation sa Dakbayan sa Talisay diin siya napatay lakip na ang iyang asawa.
Matud ni Dela Rosa nga gipaimbestigar na sa iyang Director for Personnel and Records Management (DPRM) ang taho.
“Bantay lagi mog ma-establish nako. Ma-validate nako nga bayaran mo. Kami diri nagpakamatay na mi sa internal cleansing tapos kamo, gibinuangan ra ko ninyo. Pangbitayon gyud tamo mga polisa mo. Bantay lang mo”, matud ni Dela Rosa.
Matud pa nga ang mga polis nga marelibo, adto na mo-report ug mopirma og attendance sa Camp Crame diin husayon ang ilang kaso.
“Polis gihapon sila. Ato silang gitanggal diri para ma-disrupt sila sa ilang gipanghimo nga maundang na ang ilang pamprotekta sa ilegal nga droga ngari,” sumala pa ni Dela Rosa.
Si Quiamco narelibo gikan sa Cebu Provincial Police Office human kini naapil sa listahan sa mga durugista ni Presidente Rodrigo Duterte. - /GMR) (BANAT NEWS)