Palma andam makig-atubang sa taga Olango
CEBU, Philippines - Si Cebu Archbishop Jose Palma, mosusi kon aduna ba siya’y naka-schedule nga dayalogo tali sa mga parokyano sa Brgy. Santa Rosa sa Olango Island human adunay reklamo batok sa kura paruko sa nahisgutang lugar. Giingong nasubo ang maong mga parokyano kay wala niya aksyoni ang ilang suliran.
Gibutyag sa Obispo sa Artsdayosis sa Sugbo nga tingali nagtuo ang mga parokyano nga wala niya hatagi og pagtagad ang ilang reklamo, kay matud niya nga sa higayon nga aduna siya’y madawat nga reklamo, iya dayon kining paadtoan og vicar general aron makighinabi sa pari nga gireklamo.
Dugang ni Palma, wala siya masayod kon unsay aksyon nga gustong mahitabo sa mga parokyano, kay adunay gusto nga papahawaon ang maong pari apan diin dili kini maoy palisiya sa artsdayosise.
Sumala niini, ang pagpahawa sa kura paruko dili maoy sulbad sa reklamo, hinungdan nga makig-alayon siya sa vicar general ug andam usab siya’ng makigdayalogo sa mga parokyano ug iyang sutaon kon aduna ba siya’y schedule alang niini. (BANAT NEWS)
- Latest