Pagsugod sa underpass project wa pay klaro

CEBU, Philippines - Dili pa segurado kung kanus-a magsugod ang pag-ugmad sa underpass project sa may Natalio Bacalso Avenue, Siyudad sa Sugbo.

Una niini, ang project engineer nga si Engr. Roy dela Cruz niingon nga sa Martes sunod semana sugdan ang underpass human ila na nga gitagad ang concerns sa Cebu City Transportation Office.

Kini sama sa pag-aspalto sa libaong nga dalan sa mga alternate route ug pagbutang og mga signages.

Nahunong ang dry-run sa maong proyekto human daghang nakitang kakulian ang CCTO nga gihulagway nila nga usa sa hinungdan nga makamugna og kahuot sa dagan sa trapiko.

Gipasabot ni dela Cruz nga mas maayo nga samtang magtrabaho diha sab buhaton ang ubang adjustments nga ilang makita aron dili mosamot kalangan ang maong proyekto.

Ang underpass project dunay upat ka stages apan si dela Cruz niingon nga inay magsugod sila sa stage 1 o kining lane padulong sa habagatang bahin sa Sugbo, unahon una nila ang stage 2 nga mao ang lane alang sa mga sakyana padulong sa downtown area.

Ang rason nga dili una sila magsugod sa stage 1 gumikan sa linya sa Metropolitan Cebu Water District diin hatagan una og higayon sa Department of Public Works and Highways kun unsaon ang maong mga tubo.

Matud sa operation head sa CCTO, Francisco Ouano, nga wala pa sila mohatag og pagtugot ug tun-an una nila ang plano sa DPWH.

Gusto nila nga mapatuman ang maong proyekto apan iagi sa saktong proseso nga dili maapektuhan ang mga motorista ilabi na nga sila ang mahan-ukan sa tanan.

“Basically, dili ta mosugot karong Tuesday, lisud gyud ta, maglisud gyud mi, imagine mag-andam pa ta sa signboard. Mismo kami gusto mi madali kay kahibawo ko naay kalambuan sa siyudad pero ang ato dili man sad gud ingon ana although sila moingon okay trabaho nila pero so far as CITOM is concern maglisud pa ta, wala pa gyud baya na sila nahuman og patching, ang bottom line ana end up anhi lang gihapon sa CITOM, kinsa may ma-blame ang CITOM dili ang DPWH.  (BANAT NEWS)