CEBU, Philippines - Nakuha sa close circuit television (CCTV) camera ang pagtulis ug pagpusil sa langyaw nga kaslonon sa may Mini Stop sa South Town Centre, Bulacao, Dakbayan sa Talisay sa niaging semana.
Matud ni Senior Insp. Albert Quilotorio, deputy chief sa Talisay City Police Station, nga ila nang gihangyo ang tagdumala sa edipisyo sa paghatag kanila og kopya sa CCTV footage.
Si Quilotorio nipasabot nga ilang i-enhance ang kopya nga ilang makuha aron maklaro gyud ang panagway sa tulo ka tulisan.
Giingong nagkalingaw og inom-inom ang biktima nga si Tarek Naggar, 44, lumad nga taga Glasgow, Scotland, uban sa higalang langyaw ug sa iyang pangasaw-onon nga si Ange Leh Bacaron.
Kalit nga niabot ang tulo ka lalaki ug nition og armas dayon deklarar og tulis.
Tungod sa pagkisi-kisi sa biktima gipusil siya sa armadong lalaki igo sa iyang tuong bahin sa dughan.
Anaa si Naggar sa South General Hospital sa Dakbayan sa Naga nagpaalim sa iyang samad pinusilan ug giingong anaa na sa luwas nga kahimtang samtang nakig-alayon na ang kapolisan sa British Consulate. (BANAT NEWS)