CEBU, Philippines - Ang kapolisan sa siyudad sa Talisay nagtampo-tampo aron makatapok og mga hinabang nga ilang ihatag ngadto sa mga residente sa dakbayan sa Marawi kinsa naapektohan sa pagpanghasi sa terorista ngadto sa ilang lugar.
Si Senior Inspector Albert Quilotorio, deputy chief sa Talisay City Police Station nibutyag nga iyang gihangyo ang iyang mga kaubanan nga mohatag og ginagmay nga hinabang para sa mga nabiktima sa engkwentro tali sa gobiyerno ug Maute.
Matud ni Quilotorio nga dunay nihatag og mga tinaro nga biskwit, noodles, delata, used clothing ug uban pa.
Matud pa ni PO3 Christopher Cesa, Police Community Relation (PCR) nga ang ilang natigom nga hinabang gidala nila ngadto sa Cebu Provincial Police Office (CPPO) aron usab kini madungan og hatag sa ubang mga hinabang.
Si PO3 Junyl Ater mipadayag nga labing maayo nga kita ang mohatag kompara nga kita ang hatagan.
Matud usab niya nga dili lalim ang nasinati karon sa mga residente ngadto sa Marawi sa padayong engkwentro tali sa gobiyerno ug Maute.
Dugang pa niya nga bisan og gamay lang ang ilang napadala nga hinabang apan nakasiguro siya nga nakatampo sila sa panginahanglan sa katawhan nga naapektohan sa engkwentro.
(BANAT NEWS)