CEBU, Philippines - Mokabat P1.5 milyon nga shabu ang nasakmit atol sa managlahing buy-bust operation sa Barangay Lorega ug Tisa ning Dakbayan sa Sugbo nga gipahigayon sa mga sakop sa City Intelligence Branch (CIB) niadtong Domingo sa gabii ug kagahapon sa kaadlawon.
Unang gironda sa mga sakop sa CIB ang Sitio Lawis Phantom, Barangay Lorega San Miguel ug nadakpan ang High Value Target nga 50-anyos nga babaye nga si Nieva Abella Pocdol alyas "Embing" nga residente sa maong lugar.
Nakuha sa maong dinakpan mao ang tulo ka medium, pito ka dagko ug upat ka “extra-large” nga pakete sa gidudahang shabu nga mobalor og P1.4 milyon.
Si Chief Inspector Christopher Navida, hepe sa CIB niingon nga makabaligya ang maong suspetsado og 40-50 gramos matag semana.
Matud pa nga aduna kini koneksyon ni Archie Abellana kinsa natanggong na karon sa BBRC tungod sa kaso sa druga.
Sunod nga gironda sa mga sakop sa CIB ang panimalay sa usa ka Rex Cerilles Labadan alyas “Bayi,” 38, sa Barangay Tisa.
Nakuha gikan niya ang upat ka gagmay, tulo ka medium ug usa ka dakong pakete sa gituohang shabu.
Si Labadan giingong konektado sa ilang nadakpan nga si Joselito Arellano alyas Otik nga kanhi sinaligan sa napatay nga si Jeffrey Diaz alyas ‘Jaguar.’
Samtang gidakop sa mga sakop sa RSOG 7 ang igsuon sa usa ka pulis nga giingong usa ka rank 3 High Value Target sa rehiyon nga si Dennis Simmons Diola, 48, ug iyang kapuyo nga si Mannilyn Gamboa Arquillano, 22, nga rank 6 HVT sa rehiyon.
Nakuha gikan sa duha ang upat ka gagmay ug duha ka dagko nga pakete sa gituohang shabu ug .38 revolver ug mga bala niini. Camille L. Pateres ug Rowena Capistrano (BANAT NEWS)