CEBU, Philippines - Hatagan ni Cebu City Mayor Tomas Osmeña og kagawasan si Bise Mayor Edgardo Labella nga mohimo sa iyang kaugalingong assignment aron modumala sa Police Coordinating and Advisory Council (PCAC).
Daan na nga niingon si Osmeña nga mahimo ra nga si Labella maoy mopadagan sa PCAC apan ang bise mayor buot mangayo og written designation gikan sa mayor.
Sigun ni Osmeña nga wala siya’y problema niini dungan sa pagbutyag nga duna siya’y mga ideya kung unsay mga buhaton, kakuwang ug kung asa mahimong makatabang ang siyudad.
Kini sama sa pag-decongest sa Cebu City Jail ug ang pagmonitor sa mga drug cases nga nasang-at ug kadtong mga wala napasaka.
Dugang sa mayor nga hayan duna say matabang si Labella.
Matud ni Osmeña nga si Konsehal Dave Tumulak kinsa maoy deputy mayor for police matters ang iyang representante sa PCAC nga mahimong pangulohan ni Labella.
Atol sa informal meeting sa niaging adlaw, gipatawag ni Labella ang mga law enforcement agencies nga sakop sa PCAC.
Wala nadayon ang pag-convene sa PCAC sanglit base sa ordinansa sa siyudad, ang mayor lang ang mahimong maka-convene niini gawas kung duna kini itudlo nga tawo. (BANAT NEWS)