CEBU, Philippines – Giawhag ni environ-mentalist lawyer Benjamin Cabredo ang bag-ong kalihim sa Department of Environment and Natural Resources, Secretary Roy Cimatu sa pag-imbestigar sa mga sayop nga nahimo sa iyang mga tawo sa Sugbo.
Gitumbok ni Cabredo ang sayop sa pagluwat og Cease and Desist Order (CDO) sa DENR-7 batok sa Island Shipping Corporation sa pagpahunong sa ilang giugmad nga shipyard sa Punta, San Remigio, Cebu.
Matud ni Cabredo nga nagpagamit ang DENR sa usa ka politiko dihang giluwatan ang CDO batok sa Island Shipping Corporation bisan ang shipyard gipanag-iya sa Elite Fabrication Yard.
Ang Elite nag-operate upat na ka tuig ang nakalabay nga wala’y problema hangtud ang tag-iya sa Island Shipping nga si Alex Tan giingong gihasi ni Sta. Fe Mayor Jose “Titing” Esgana kinsa sakop sa Tañon Strait Protected Seascape-Protected Areas Management Board (TSPS-PAMB) sa DENR.
Si Cabredo wala nitahud sa CDO nga iya gihulagway nga ilegal human wala siya hatagi og higayon pinaagi sa Show Cause Order (SCO) sa pagtubag kung unsay problema sa proyekto.
“If no SCO, how can these questionable DENR officials determine that the yard is encroaching the Tañon Strait?” pangutana ni Cabredo.
Matud ni Cabredo nga kung nagsusi lang ang taga DENR, masayud unta nga ang shipyard anaa sa Hagnaya Channel ug dili sa Tañon Strait.
Dugang ni Cabredo nga gawas nga gisupak sa taga DENR ang ilang kaugalingong balaud, wala pa gyud gisunod ang lagda sa National Integrated Protected Areas (NIPAS) Act.
Nunot gipahimang-nuan ni Cabredo ang kapolisan sa dili pagpatuman sa ilegal nga CDO aron dili sila makasohan. (BANAT NEWS)