CEBU, Philippines - Gipahigayon kagahapon sa hapon ang case conference sa kapolisan sa Dakbayan sa Mandaue aron masuta kung asa na sila dapit sa imbestigasyon sa kamatayon ni Barangay Kapitan Antonio Maquilan sa Mantuyong.
Matud ni Senior Supt. Roberto Alanas, director sa Mandaue City Police Office, nga aduna na sila’y ginuntan karon nga suspek sa pagpusil kang Maquilan nga ilang nailhan nga hitman apan dili pa nila matumbok ang pangan hangtud dili pa nila mapasaka ang kaso niini.
Sumala pa ni Alanas nga kung ilang masikop ang suspek ilang palapdan ang imbestigasyon kung kinsa ang mastermind ug unsa sab ang motibo sa pagpusil sa kapitan.
Wala nila gisalikway ang posibilidad nga personal nga bangi ug negosyo ang motibo human ang kapitan nakadawat na og mga hulga sa iyang kinabuhi.
Gitug-an ni Alanas nga nagpabilin pa sa rehiyon ang mamumuno kinsa ila nang nakuhaan og codename sa pangan ug aduna sab sila’y gihuptan nga mga saksi.
Ang mamumuno giingong dunay kaso kanhi nga pagpamusil sa Dakbayan sa Mandaue apan wala molampus tungod kay nisibog ang reklamante.
Padayon ang gihimo karon nga monitoring sa maong mamumuno.
Gipadayag ni Alanas nga sa dinalian nga panahon mopagawas sila og hulagway sa suspek samtang gisusi pa nila ang mga kuha sa close circuit television camera ug gipatan-aw sa cybercrime unit ang cellphone sa kapitan.
Gibantayan sab sa kapolisan ang panimalay sa kapitan aron paghatag og seguridad sa pamilya ug sa pagduyog usab sa kamatayon sa kapitan. (BANAT NEWS)