CEBU, Philippines - Bag-o na ang modumala sa kapulisan sa probinsya sa Sugbo human gibalhin ang kasamtangan nga direktor sa Cebu Provincial Police Office nga si Sr. Supt. Eric Noble aron himuong police attaché didto sa Amerika.
Ang maong impormasyon gikompirma sab ni Chief Supt. Noli Taliño, director sa Police Regional Office -7 nga nahinabi sa mga tigbalita.
Molingkod isip Officer-in Charge sa CPPO mao si Sr. Supt. Dennis Agustin, ang deputy regional director for operations sa PRO-7.
Matud ni Taliño si Noble apil sa napilian ug gidawat usab kini sa opisyal human giaprobahan sa PNP Chief ang iyang bag-ong assignment.
Sigun pa ni Taliño nga dili tanan nga polis opisyal ang pwede nga molingkod isip police attaché kay kinahanglan nga eligible kini ug usa niini si Noble.
Matud pang Taliño maayo ang performance ni Noble paglingkod sa CPPO tungod sa kadaghan sa nahimo niini sa kampanya batok sa ilegal nga drugas ug daghan sab nga badlungong polis ang nadisiplina.
Gitug-an ni Taliño nga usa sa mga hagit sa mga mohulip kang Noble ang palabwan pa ang nahimo niini.
“Basta’t magtatrabaho at malampasan niya yung performance ni Koronel Noble, ‘yan ang kailangan natin dito sa Cebu,” saysay pa ni Taliño. (BANAT NEWS)