Pag-ayo sa kanal gisugat sa baha

CEBU, Philippines - Gisugat sa kusog nga uwan ug baha ang gikatakda untang pag-ayo sa mga kanal sa Dakbayan sa Mandaue niadtong Lunes. Matud ni Mayor Gabriel Luis Quisumbing nga duha ka semana na nilang gitakda ang paghabwa sa mga kanal sa pagtuo nga ting-init na karong semanaha.

“We were hoping that we could use the good weather to be able to dredge the water ways, dredge the canals, Butuanon river and flushing the existing drainage pero, mother nature, kusog kaayo ang uwan,” matud ni Quisumbing atol sa 888 News Forum sa Marco Polo Plaza kagahapon.

Matud ni Quisumbing nga ang kusog nga uwan naatol pa gyud nga may giayo ang Department of Public Works and Highways sa may A.C. Cortes Avenue hangtud sa Mandaue-Mactan Bridge diin gisirad-an ang bahin sa kanal nga giayo.

Gipahibawo ni Quisumbing nga gisibog sa Biyernes ang pag-ayo sa mga kanal gamit ang mga kahimanan sa DPWH gumikan kay dili na makaya sa kahimanan sa siyudad ang pagkabara sa mga kanal.

Samtang nakugang ang Metropolitan Cebu Water District kay bisan pa man sa maong pag-uwan ubos gihapon ang production level sa Buhisan Dam.

Apan matud ni Charmaine Rodriguez-Kara, tigpamaba sa MCWD, nga angayan gihapon nga magmabinantayon ang residente sa Buhisan sanglit kuyaw kini kung may dam break ug linog.

Ang PAGASA nipahimangno sa katawhan nga magmabinantayon human kini niluwat og yellow ug orange rainfall warning nga nagpasabot nga "heavy rainfall" sa Sugbo ug ubang dapit sa Kabisay-an. Gregg M. Rubio ug Mitchelle L. Palaubsanon (BANAT NEWS)