CEBU, Philippines - Dugang 11 ka kawani sa unom ka barangay dinhi sa Dakbayan sa Sugbo ang napositibo sa drug test nga gipahigayon sa Cebu City Office for Substance Abuse Prevention (COSAP) kaniadtong Martes.
Ang hepe sa COSAP nga si Dr. Alice Utlang mitug-an nga 86 na ka buok ang tanang kawani sa barangay nga napositibo sa drug test sukad lang kaniadtong Enero.
Kaniadtong Martes, gidungan pag-drug test ang kapin sa 100 ka garbage loaders, tanods ug drayber gikan sa Barangay Lorega-San Miguel, Hipodromo, Carreta, Tejero, Day-as, Cogon-Ramos ug Mabolo.
Matud ni Utlang nga sa pito ka barangay, ang Mabolo ra gyud maoy walay mga kawani nga napositibo sa drug test.
Gisumiter na ni Utlang ngadto sa opisina ni Mayor Tomas Osmeña ang mga pangalan sa napositibo sa drug test. Sagad sa mga napositibo mga garbage loaders.
Gusto ni Osmeña nga ang mga opisyal sa kabarangayan motaktak sa ilang mga kawani nga mamatud-ang drug user.
Kahinumdoman nga gipahunong sa mayor ang pagpahatag og City Hall honorarium ngadto sa mga garbage loaders ug tanod sukad niadtong Abril 1, tungod sa nadawat niyang report nga daghan kanila ang adik.(BANAT NEWS)