Pundo gikan PAGCor di mao ang gigastuhan

CEBU, Philippines - Gipatubag sa Commission on Audit (COA) si Mayor Tomas Osmeña lakip na ang ubang mga opisyal sa siyudad kalabot sa matud pa dili husto nga paggamit sa Philippine Amusement and Gaming Corporation (PAGCor) funds.

Subay kini sa paggamit sa siyudad sa pundo sa PAGCor nga moabot sa P2.5 milyones nga giingong gibayad sa electrical supplies sa Mabolo Elementary School, pagpalit ug pag- deliver og Monobloc chairs ug tent ug pagpalit og bag-ong sakyanan.

Gitumbok sa COA nga ang mga nahisgutan, wala malakip sa lagda, kay base sa gilagdaan, ang mahimong gamitan sa pundo sa PAGCor mao ang livelihood projects, scholarship, infrastructure projects, mga proyekto labot sa paghatag sa nag-unang serbisyo, peace and order, emergency assistance ug uban pa. Tungod niini, gusto og katin-awan ang COA.  Ang siyudad gihatagan og 90 ka adlaw aron makahatag og katin-awan aron dili hingpit nga i-disallow ang ilang gigasto.

Andam motubag si Osmeña sa COA apan iyang giklaro nga wala siya masayod sa kinatibuk-ang istorya nganong gipahunong sa COA ang maong transaksiyon. (BANAT NEWS)