CEBU, Philippines - Ang labaw’ng opisyal sa kapolisan sa lalawigan sa Sugbo miisip nga mga bayani ang konsehal sa Barangay Lu-ka, Balamban ug ang tanod sa Cansaga, Consolacion nga gipatay tungod sa kaaktibo nila sa kampanya batok sa gidiling drugas.
Si Cebu Provincial Police Director Eric Noble miingon nga si Konsehal Cornelio Pepito, 64, nga gipusil didto sa Balamban kaniadtong Marso 22, ug si tanod Wilson Batucan, 50, nga gipusil usab kaniadtong miaging adlaw didto sa Consolacion walay mga personal nga kontra.
Ang hepe sa Balamban Police Station nga si Senior Inspector Ramil Morpos miingon nga si Pepito mitabang gyud sa mga polis sa anti-drug operations ug tungod niini daghan na ang nasikop sa ilang dapit. Kini sab ang nakita nga motibo sa kapolisan sa Consolacion sa pagpatay sa tanod nga si Batucan.
Alang ni Noble usa ka bayanihong buhat ang gihimo nila ni Pepito ug Batucan nga wala nahadlok sa pagtabang sa mga polis aron lang malimpyo sa drugas ang ilang lugar bisan pa sa karisgo sa ilang gibuhat.
Gimandoan ni Noble ang kapolisan sa Balamban ug Consolacion nga sulbaron gyud ang pagpatay nila ni Pepito ug Batucan. Awhag ni Noble sa mga misuporta sa ilang kampanya kontra drugas nga dili mahadlok sa mga kriminal. Sa laing bahin, gibutyag ni Police Regional Director Noli Taliño nga may listahan na ang kapolisan sa mga opisyal sa kabarangayan nga nalambigit sa drugas. (BANAT NEWS)