CEBU, Philippines - Libre na nga makaagi bisan unsang orasa ang mga dagkong truck nga moagi sa Cebu South Coastal Road (CSCR) human gilibkas na ang truck ban sa konseho sa Dakbayan sa Talisay.
Nipasar og ordinansahon si Konsehal Arturo Bas nga ilibkas ang karaan nilang ordinansa diin ang coastal road ilakip sa truck ban.
Ang aksiyon sa konsehal nagbasi sa hangyo sa mga sakop sa Mega Cebu nga dili ilakip sa truck ban ang coastal road.
Sa nasayran, ang hepe sa City of Talisay-Traffic Operation Development Authority (CT-TODA) nga si Almond Dela Peña hugot nga nipatuman sa truck ban gikan sa alas 4 sa buntag hangtud sa alas 8 sa buntag samtang mobalik sa alas 4 sa hapon hangtud sa alas 8 sa gabii.
Apan niadtong nakalabay nga mga semana nilugak sila kay giabusaran kini sa mga nataktak nga traffic enforcers nga padayong nanakop ilabi na sa may SRP.
Ang truck ban gipatuman aron malugakan ang trapiko sa Talisay apan niining bag-ong ordinansa, gilauman nga magtipun-og unya ang mga dagkong truck sa coastal road. (BANAT NEWS)