CEBU, Philippines - Bukas si Talisay City Mayor Eduardo Gullas sa tanang magpapatigayon sa ilang siyudad ilabi na sa Filinvest Land Inc. nga daw sa giabog sa kadagkuan sa Siyudad sa Sugbo gikan sa South Road Properties.
Matud ni Gullas nga daan na nga may high-end subdivision ang FLI sa Talisay nga mao ang Corona del Mar maong dili na lisud alang kanila.
Siya nitataw nga adunay daghang lugar sa Talisay nga puwedeng matukuran sa mga negosyante sa ilang mga negosyo. Apan dunay hangyo si Gullas sa mga magpapatigayon nga hatagan og higayon ang taga Talisay nga makatrabaho sa ilang kompaniya.
Ang Filinvest Land Inc. niatras sa ilang pagpalit sa 19 ektarya nga luna sa SRP.
Nunot niini si Presidential Assistant for the Visayas, Michael Dino, nihagit kang Cebu City Mayor Tomas Osmeña nga mopakita og investor nga mopalit sa 40 ektarya nga luna sa SRP sa tag P110,000 matag metro kwadrado kay andam siya mobiya sa iyang puwesto ug sa Dakbayan sa Sugbo.
Matud pa ni Dino nga sulod sa usa ka buwan sugod kagahapon ang iyang hagit kang Osmeña.
Gipasabot ni Dino nga angay lang nga ang mga lokal nga kagamhanan dili mo-hostage ug mo-blackmail sa mga magpapatigayon sa ilang mga business permit aron mulambo ang ekonomiya sa lugar.
Kung wala’y mahitabo sa usa ka buwan, matud ni Dino nga angay nga may tawo nga mohawa sa iyang posisyon. Gabriel C. Bonjoc ug Rowena D. Capistrano (BANAT NEWS)