CEBU, Philippines - Nasikop sa kapolisan ang duha ka babaye sa Siyudad sa Talisay nunot sa subsob nga pagpanakop sa ilegal nga sugal sa nagkalain-laing barangay.
Ang kapolisan pinangulohan ni Supt. Emerson Dante nironda sa Barangay Tabunok diin adunay Peryahan Lucky Tres outlet niadtong Martes sa gabii.
Ilang nasikop si Elvina Raagas, 32, dalaga nga nagpuyo sa Pardo, Siyudad sa Sugbo ug lumad nga taga Bonbon, Cagayan de Oro City.
Samtang nilahos sa Barangay Lawaan II ang mga operatiba ug ang susamang ilegal swertres outlet ang ila na sab nga girumbo ug nasikop si Rosvel Suan, 21, dalaga nga taga Tubod, Lungsod sa Minglanilla.
Sa Sitio Pungsod, Barangay Lawaan 3 nasakmit sab sa mga polis ang usa ka moli-moli ug video karera machine.
Niadtong niaging semana nibahad si Dante ngadto sa mga ilegal swertres operators nga mohimo gyud sila sa pagpanakmit sa ilegal nga matang sa sugal.
Samtang nasikop sa managlahing anti-illegal gambling operations sa kapolisan ang unom ka tawo nga nagpasiugda og ilegal nga swertres, nagdula og tong-its ug mahjong sa Dakbayan sa Mandaue, Consolacion ug Compostela.
Sa Poblacion, Compostela nadakpan si Cecile Caang Idano, 50, nga naaktuhan nga ilegal nga nangisyo og swertres alas 6 pasado sa niaging gabii.
Nasakmit gikan kaniya ang tally sheet, stub nga adunay kombinasyon sa numero ug kwarta nga P90.
Samtang sa Nangka, Consolacion maoy nadakpan alas 9 pasado sa niaging gabii si Richard Sucat Alpas, Jr., 21, kinsa nasakmitan og stub, mga tally sheets ug kwarta nga P55. Dugang nasikop mao sila si Jeffrey Palanas, 37; Romel Pareja, 40, ug Debol Pallera, 37, taga Sudlon, Maguikay, Dakbayan sa Mandaue.
Nasakmit gikan sa mga dinakpan ang P40 nga pusta ug lakip na usab ang gigamit nilang baraha sa tong-its.
Sa Villa Manga, Opao, sa maong dakbayan nadakpan sab si Sulpicio Sungahid, 53, kinsa wala ka dagan dihang kalit nga gironda sa mga polis ang maong lugar. Gabriel C. Bonjoc ug Romeo T. Limpangog (BANAT NEWS)