CEBU, Philippines - Daghang paagi kun unsaon pagsaulog ang Adlaw sa mga kasing-kasing matud pa ni Cebu Archbishop Jose Palma kay ang gugma mamunga og maayong panag-ingnan alang sa tanang katawhan.
Sumala pa ni Palma, ang gugma dili lang kutob sa feelings, kun dili lakip usab ang willingness kay kun pulos lamang pagbati, posible kining mahugno ilabi na kun batan-on pa. Hinungdan nga kinahanglan ang pag-ampo nga masustiner ang gugma gikan sa Ginoo.
Ang arsobispo nibutyag nga ang tinuod nga kahulugan sa gugma, nagdala og kaayohan lakip ang kalambuan, diin kon gikan sa Ginoo ang gugma, nagkahulugan kini og sakripisyo ilabi na ang gugma gikan sa mga ginikanan, magtutudlo ug sa mga tawong adunay dakung gugma sa iyang isig katawo.
Dugang niini nga motuo siya og forever kay ang tinuod nga gugma, usa man ka forever ug ang labing nindot niyang nahimo sa gugma mao ang pagtubag sa gugma sa Ginoo. Samtang si Archbishop Emeritus Ricardo Cardinal Vidal nitug-an nga angayan gyud nga unahon sa paghigugma sa katawhan ang Ginoo, aron makapaambit sila niini ngadto sa ilang isigkaingon.
Si Vidal, mutoo sab og forever sa laing hugna sa kinabuhi, tungod kay inubanan kini sa probidensya sa Ginoo. Subay sa kasaulogan sa Adlaw sa Gugma, ang mga bulak sa Carbon Public Market diin matud sa manindahay nga si Goloy Abanilla nga sugod niadtong Domingo nag-display na sila og mga bulak diin adunay lokal ug aduna say gikan sa Baguio.
Gibutyag ni Abanilla nga bisan og mahal ang mga bulak panahon sa Valentine’s Day, daghan gyud ang mamalit ilabi na ang mga batan-on. -/DILT (BANAT NEWS)