CEBU, Philippines - Uyon si Talisay City Mayor Eduardo Gullas nga ibalik ang Reserved Officers’ Training Corps sa mga tunghaan.
Si Gullas niingon nga ang mga batan-ong Pilipino mao ang target sa programa aron pagtudlo kanila sa disiplina sa kaugalingon ug pagmahal sa nasud nga Pilipinas.
Siya nagtuo nga target ni Presidente Rodrigo Duterte mao nga malikay sa ginadiling drugas ang mga batan-on tungod kay aduna na man sila’y disiplina sa ilang kaugalingon.
Asoy pa niya nga siya nalipay nga gibanhaw sa Presidente ang ROTC nga dugay na sab niya nga gipakigbugno sa Kongreso sa panahon nga siya magbabalaud pa.
Iyang nahinumduman nga sukad niadtong 2007 nagsige na siya og duso sa hawanan sa Kongreso apan pirme lang siya napakyas.
Siya nitug-an nga nisamot nga nababagan ang iyang giduso nga balaudnon tungod sa panghitabo nga pagkamatay sa tinun-an sa University of Santo Tomas (UST) tungod sa hazing.
Para niya malikay ang tinunto kung aduna’y lig-on nga liderato gikan sa mga opisyal sa ROTC ug mao usab kini ang maayo nga buhaton aron mabalik kini nga programa.Giaprubahan ni Duterte ang pagbalik sa mandatory military training sa eskwelahan ug iya kining gi-certify nga dinalian sa Balay-Balauranan. (BANAT NEWS)